＊從地鐵夢村土城站一出，便會見到和平廣場，正是奧林匹克公園的入口！
＊在和平廣場旁可以租單車遊園。
所以，我地兩個懶人決定搞搞新意思，坐二人單車遊公園。
＊公園內，有一個大湖，兩旁的樹葉又黃又紅，超美！
＊在美術館旁邊的草坪上和公園內陳列左 204 件雕塑作品，呢個係其中之一。
＊秋色處處見。
＊樹叢中又見雕塑。
＊呢個大拇指（Thumb Up）雕塑係公園內最著名的雕塑，亦係公園九景之一。
＊踩完單車，再坐呢架觀光小火車。
＊孤獨的樹－－公園九景之一。（韓國電影《我的野蠻女友》也曾在此拍攝）
第四天早上，又繼續上午戶外追楓行程，今次去奧林匹克公園，坐地鐵到夢村土城站下車，步出站口即到達公園的和平廣場。
奧林匹克公園和北首爾夢之森、世界盃公園、首爾林並列，被稱為首爾四大公園，為紀念舉辦 1988 年奧運而建，佔地面積 140 萬多平方米，公園內有擊劍館、體操館、賽車場、游泳館等體育場館和 SOMA 美術館、雕塑公園、藝術大廳等文化設施，建議可以先到和平廣場左側的遊客服務中心先取得公園平面圖。
公園內有著名的九景，分別是世界和平之門、大拇指雕塑、音樂噴泉、對話雕塑、夢村土城、孤單樹、88湖、花之廣場、玫瑰廣場。若想遊畢整個公園，大約需要三小時之上，我地係懶人一族，選擇雙人單車代步，在廣場左邊有雙人或四人單車租賃服務，以雙人單車計，一小時兩人需 10,000 韓圜，我地租兩小時，合共 20,000 韓圜，交現金後即可取車慢慢踩。
第一次踩呢種雙人單車，原來操控絕對唔輕易，尤其我地又唔熟公園單車路，結果經常落車手動推車就位，又試過行錯行人路，俾公園保安驅趕，蝦碌連場，都幾搞笑。終於磨到屁股赤赤痛，又唔知有無行勻整個公園，已經夠鐘交車，於是又趕住踩回廣場入口。以為踩單車可以慳水慳力，點知搞到身水身汗，而且都唔知自己遊左幾多個景點！
於是我地決定又坐埋遊園觀光小火車——小虎列車，一日有幾個班次，每人來回車票 1,800 韓圜。下午一點鐘開車，沿途經常的風景，其實我地全部都踩單車經過，唔夠半小時已經來回完畢，真係有少少搵笨的感覺。
由於我最想去睇孤獨的樹，於是返回遊客服務中心問路，原來就在廣場的左邊，過橋後上小山坡，必須用腳步行先至可以到達，好在十分鐘搞掂。呢棵孤獨的樹在平坦小斜坡上屹立，四周只有草地，並無其他樹木，感覺好特別，尤其跟佢合照時，四野無人，只有樹同自己，好似好荒涼咁，完全唔似係公園的一角，幾有趣！
結果，我地由10點一直玩到下午 2 點先離開，又單車又觀光小火車又用腳行，遊勻整個公園，亦影盡唔少紅葉靚相，好夠皮！
奧林匹克公園（올림픽공원）
地址：首爾松坡區奧林匹克路424（서울시 송파구 올림픽로 424）
交通：首爾地下鐵 5 號線奧林匹克公園站 3 號出口／地下鐵 8 號線夢村土城站 1 號出口（建議在夢村土城站出較方便）
在和平廣場的左右兩側還設有樂天漢堡店、星巴克咖啡、Family Mart 便利店、西餐廳等設施
＊在小農民愛草莓餐廳附近還有遊園觀光小火車——小虎列車的售票處。觀光小火車費用：1,000 韓圜（單程）；1,800 韓圜（來回）
2人大型單車：30 分鐘 3,000 韓圜 x 2；60 分鐘 5,000 韓圜 x 2
沒有留言:
張貼留言